በሐምሌ ወር 1994 ዓ.ም ቅዱስ ሲኖዶስ ያጸደቀው የማኅበረ ቅዱሳን መተዳደሪያ ደንብ

                                               ከማኅበሩ የሕዝብ ግንኙነት አግልግሎት

 

በቅዱስ ሲኖዶስና በብፁዕ ወቅዱስ ፓትሪያርክ መልካም ፈቃድ በኢትዮጵያ ኦርቶዶክስ ተዋህዶ ቤተ ክርስቲያን በሰንበት ትምህርት ቤቶች ማደራጃ መምሪያ ሥር ተዋቅሮ መንፈሳዊና ማኅበራዊ አገልግሎት በማበርከት ላይ የሚገኘው ማኅበረ ቅድሳን በቅዱስ ሲኖዶስ ጸድቆ በተሰጠው መተዳደሪያ ደንብ መሠት ዕውቅና አግኝቶ ከተመሠረተበት ከ1984 ዓ.ም ጀምሮ በማዕከላት በዓመት አንድ ጊዜ ጠቅላላ ጉባኤ ያደርጋሉ፡፡ በዚህም መሠረት በማዕከሉ ሥር ከተዋቀሩት ወረዳ ማዕከላት፣ ግንኙነት ጣቢያዎችና ግቢ ጉባኤያት የተወከሉ ጠቅላላ ጉባኤ ያደርጋሉ፡፡

የኢትዮጵያ ኦርቶዶክስ ተዋሕዶ ቤተክርስቲያን ሊቃውንት ብራና ዳምጠው፤ ቀለም በጥብጠው፣ ብዕር ቀርጸው በየአብያተ ክርስቲያናቱ የመቃብር ቤቶች ውስጥ በማስተማር ትውልዱ የሀገር መሪ፣ የቤተክርስቲያን አለኝታ፣ የእግዚአብሔር ቅን አገልጋይ እንዲሆን ያበረከቱት አገልግሎት ከዘመን ዘመን እየተሸጋገረ ለትውልድ ሲተላለፍ የኖረና የሚኖር ነው፡፡

የኢትዮጵያ ኦርቶዶክስ ተዋሕዶ ቤተክርስቲያን ለሀገራችን ሥልጣኔ በር ከፋች ሆና የኖረች ከመሆኗም በላይ ዛሬ ላለው ዘመናዊ ሥልጣኔም መሠረት የጣለች ባለውለታ ናት፡፡ ቀደምት የቤተክርስቲያን አበው ደከመን፣ ሰለቸን ሳይሉ ዐረፍተ ዘመን እስከገታቸው ድረስ ሲያገለግሉ ኖረው ቤተክርስቲያኒቱ አሁን ከምትገኝበት የዕድገት ደረጃ አድርሰዋታል፡፡

የኢትዮጵያ ኦርቶዶክስ ተዋሕዶ ቤተክርስቲያን በምትመራበት ቃለ ዓዋዲ መሠረት የተቋቋሙት ሰበካ ጉባኤያት እና ሰንበት ትምህርት ቤቶች የመንፈሳዊ አገልግሎታቸው ተግባራዊ አፈጻጸም በተመሠረቱበት አጥቢያ ብቻ የተወሰነ ነው፡፡ በቃለ ዓዋዲው በተቀመጠው መሠረት የምእመናንም ሆነ የወጣቶች ተግባራት በቤተክርስቲያን መዋቅር ተፈጻሚ መሆናቸው ይታወቃል፡፡