ሁለት ሰዎች ናቸው በአንድ ላይ ሲኖሩ ከዕለታት አንድ ቀን አንድ ሰው መጣና «እናንተ ሰዎች ሆይ» አላቸው «አቤት ጌታችን» አሉት፡፡ ከተቀመጡበት ብድግ ብለው ተቀበሉት፡፡ «አንድ ትልቅ ነገር ላማክራችሁ ነው የመጣሁት» አላቸው፡፡ «ምን» አሉት «ይሔን ሙዳይ አያችሁት?» አላቸው፡፡ «አዎን» አሉት ሙዳዩን ትኩር ብለው እየተመለከቱ እዚህ ሙዳይ ውስጥ ታላቅ ምስጢር አለ፡፡ ሰው ሊያየው የማይችል ነገር ግን እኔ ሩቅ ሀገር ልሔድ ስለሆነ እዚያ ሔጄ እስክመጣ ከፍታችሁ ሳታዩት እናንተ ዘንድ በታማኝነት ልታስቀመጡልኝ ትችላላችሁ?» ሲል ጠየቃቸው፡፡

«እንዴ ለምን አናስቀምጥም እንኳን ከፍተን ልናየው ራሱን ሙዳዩን ካስቀመጥክበት ሣጥን አንተ መጥተህ እስክታነሣው ዞር ብለን ላናየው ቃል እንገባልሀለን» አሉት፡፡ ሰውየው ደስ አለውና ዕቃውን በአደራነት ሰጥቷቸው ሔደ፡፡

እነዚህ ሰዎች ከጥቂት ቀን በኋላ ለምንድን ነው ግን ይሔን ሙዳይ ከፍታችሁ አትዩ ያለን ብለው ተነጋገሩ፡፡ አንደኛው ለጓደኛው «ይሔን ሙዳይ አትዩ ያሉበት ምስጢር ግራ ገብቶኛል አንተስ?» ሲል ጠየቀው፡፡

 22/09/2002 ዓ.ም.

ልጆች ሕፃናት በቤተ ክርስቲያን በሚል ርዕስ አጭር ትምህርት እናቀርብላችኋለን። በደንብ ተከታተሉ፡፡ እሺ? ጐበዞች፡፡

በመጀመሪያ ሕፃናት ማለት ምን ማለት ነው? ንጹሕ ልቡና ያላቸው ክፉንና ደጉን ያልለዩ፣ ራሳቸውን ያልቻሉ በቤተሰብ እቅፍ ውስጥ ያሉ እንክብካቤ የሚያስፈልጋቸው ሕፃናት ይባላሉ፡፡
ቤተ ክርስቲያን ማለት ደግሞ፡- የክርስቲያኖች መሰብሰቢያ፣ አምላካችን እግዚአብሔርንና እመቤታችንን የሚወደሱበት ሐዋርያት፣ ጻድቃን፣ ቅዱሳን የሚመሰገኑበት፣ የእግዚአብሔር ቃል ዕለት ዕለት የሚነገርበት፣ ሰዎች ከክፉ ነገር ሁሉ ተቆጥበው ራሳቸውን ከኃጢአት የሚቆጥቡበት የተቀደሰ ቦታ ማለት ነው፡፡

ሕጻናት ወደ ቤተ ከርስቲያን ለምን ይመጣሉ? ጸጋ እግዚአብሔርን እንዲያገኙ፣ መንፈሳዊና ዘመናዊ ጥበብ ዕውቀት እንዲገለጽላቸው፣ እግዚአብሔር እንዲባርካቸው፣ ለራሳቸው ለቤተሰባቸው ለሀገርና ለሕዝባቸው ታማኝና ጨዋ ሆነው እንዲገኙ፣ በመንፈሳዊ ሕይወት /ትምህርት/ ተኮትኩተው ጥሩ ዜጋ እንዲሆኑ ለታላላቆቻቸው፣ ለእናትና አባታቸው ታዛዥ ለእኩዬቻቸው ምሳሌ /አርአያ/ እንዲሆኑ፣ መጥፎ ነገር ፈጽሞ እንዳያስቡ ነው፡፡ ጥሩ ጥሩ ጨዋታ እየተጫወቱ የሚያድጉ የዛሬ አበባዎች የነገ ፍሬዎች ሕፃናት ናቸውና ቅድስት ቤተ ክርስቲያን ትወዳቸዋለች፣ ትንከባከባቸዋለች፡፡